Republika e Kosovës

Ministria e Shëndetësisë

Kuvendi i Odës së Infermierëve zgjodhi Këshillin Drejtues dhe Këshillin Mbikëqyrës

Prishtinë, 26 shkurt 2015

Kuvendi i Odës së Infermierëve, Mamive dhe Profesionistëve të tjerë Shëndetësor (OIK) mbajti sot Kuvendin e dytë zgjedhor në të cilin anëtarët e Kuvendit zgjodhën Këshillin Drejtues dhe Këshillin Mbikëqyrës të kësaj ode.

Kryetari i kësaj Ode, Naser Rrustemaj ka njoftuar anëtarët e Kuvendit të kësaj ode me punët që po bëhen nga kjo odë në fillim të konstituimit të saj, duke e vlerësuar rëndësinë e zgjedhjes së organeve të kësaj ode.

Dr. Izet Sadiku, këshilltar politik i Ministrit Rrahmani, tha se Kuvendi shënon një moment të rëndësishëm për t’i dhënë shtytje procesit të reformës shëndetësore, ku themelimi i Odës është një nga sukseset e kësaj reforme.

Ai tha se OIK ka rëndësi të madhe në proceset e ardhshme duke qenë se do të ketë përgjegjësi konkrete në licencimin e këtij komuniteti, çështjet etike etj.

Ndërkohë që, kryetari i KQZ për Odat e Profesionistëve Shëndetësor në Kosovë, Hysni Bajrami ka njoftuar anëtarët e Kuvendit me procedurat e zgjedhjes së organeve të kësaj ode si dhe përgjegjësitë e tyre.

Kuvendi i OIK zgjodhi sot anëtarët e saj që do të përfaqësohen në Bordin për Regjistrim dhe Licencim; Komisioni për Licencimin e Infermierëve me përgatitje të mesme shkollore; Komisioni për Licencimin e Infermierëve me përgatitje të lartë shkollore; Bordin për Specializim; Bordin për Mbikëqyrjen e Etikës Profesional;  Bordi për Edukim të vazhdueshëm profesional EVP si dhe ka formuar komisionet për hartimin e Statutit të Përhershëm të OIK-së; Komisionit për hartimin e Rregullores së Punës të OIK-së; Komisionit për hartimin e Kodit të Etikës Profesionale të OIK-së dhe Komisionit për logon, emblemën dhe shenjat e OIK.