Republika e Kosovës

Ministria e Shëndetësisë

Ministri Ferid Agani takoi kryetarin e PVD-së nga Presheva, Riza Halimi

Pas takimit, Ministri Agani deklaroi për media se në takim është biseduar për disa probleme dhe nevoja specifike me të cilat ballafaqohen qytetarët  shqiptarë të Luginës së Preshevës, e që kanë të bëjnë me specializimet në mjekësi, nevojën e njohjes së dokumentacionit që lëshohet në Prishtinë e Tiranë nga institucionet e Serbisë dhe çështje të tjera që lidhen me shërbimet jetësore.

Ministri Agani tha se MSH do të bëjë mundur lehtësimin e procedurave për specilizimet e kandidatëve nga Lugina dhe në fushën e zhvillimit të edukimit të vazhduar profesional, ndërkohë që theksoi se si pasojë e vakumit politik që ekziston midis Kosovës e Serbisë, qytetarëve nga Lugina nuk u janë njohur nga Serbia dokumentet e shkollimit në Kosovë apo në Shqipëri, dhe kjo , theksoi ministri Agani, duhet zgjidhur e tejkaluar.

Kryetari i PVD-së, Riza Halimi , tha se në takim është biseduar edhe për temat që do të jenë pjesë e dialogut midis Kosovës e Serbisë dhe shprehu bindjen se do të ketë veprime konkrete për të eliminuar disa probleme si janë njohja e dokumentacioneve dhe liria e lëvizjes për qytetarët e Kosovës edhe në Serbi që është shumë e rëndësishme.
Pranimi reciprok i dokumentacionit midis Kosovës e Serbisë do të zgjidhte shumë probleme të veçanta, tha Riza Halimi, sipas të cilit, bisedat midis Kosovës e Serbisë, do të duhej të ndihmonin Luginën e Preshevës që të nxirret nga getoja ekonomike e kulturore.