Republika e Kosovës

Ministria e Shëndetësisë

Ministri Gashi u njoftua nga Ambasadori kroat për rastin e familjes Hoxha

Ambasadori i Republikës së Kroacisë në Kosovë, Zlatko Kramariq, e ka njoftuar Ministrin e Shëndetësisë të Republikës së Kosovës, Alush Gashi, lidhur me rastin tragjik të familjes Hoxha nga Tërrnja e Therandës, e cila fundjavën që shkoi kishte pësuar një fatkeqësi automobilistike afër Shibenikut të Kroacisë, nga e cili kanë mbetur të vdekur katër anëtarë të kësaj familjeje kosovare teksa po ktheheshin nga Perëndimi në Kosovë.

Ambasadori kroat i ka shprehur ngushëllime ministrit Gashi për këtë rast, ndërkohë që e ka njoftuar edhe për gjendjen shëndetësore të anëtarëve të tjerë të familjes Hoxha, të cilët janë transferuar nga autoritetet kroate në spitalet e këtij vendi për trajtim mjekësor.

Ambasadori Kramariq e ka siguruar ministrin Gashi se autoritetet shëndetësore të këtij vendi, po bëjnë krejt çka është e mundur që trajtimi i të mbijetuarve të familjes Hoxha, gjendja e të cilëve është e rëndë, të jetë sa më korrekt.