Republika e Kosovës

Ministria e Shëndetësisë

Ministri Ismaili takon ministren sllovene Celarc, marrëveshje për bashkëpunim në shëndetësi

Prishtinë, 16. 02. 2018
 
Ministri i Shëndetësisë i Republikës së Kosovës, Uran Ismaili, gjatë vizitës zyrtare në Slloveni, ka zhvilluar edhe një takim me ministren e Shëndetësisë së Sllovenisë, Milojka Kolar Celarc.
Në këtë takim, ministri Ismaili e ka njoftuar ministren Kolar Celarc me punën dhe reformat të cilat po zhvillohen aktualisht në shëndetësinë kosovare.
 
Ministri Ismaili falënderoi Slloveninë për mbështetjen e vazhdueshme ndaj Kosovës, dhe shprehu gatishmërinë e tij për ta forcuar këtë bashkëpunim edhe më tutje.
 
“Është një nderi  madh të qëndrojmë në Slloveni. Kemi pasur një vizitë të shkëlqyeshme këtu. Kemi vizituar disa spitale, në mesin e tyre edhe Spitalin e përgjithshëm të Izolas me të cilin kemi nënshkruar një marrëveshje bashkëpunimi. Ne jemi duke parë përpara për mundësitë e tjera të bashkëpunimit në fushën e sektorit shëndetësor”, tha ministri Ismaili.
 
Ne, theksoi më tej ministri Ismaili, gjithmonë e kemi parë Slloveninë si partner të madh dhe aleat të Kosovës që ka qenë me ne në momentet tona më të vështira, por edhe tani si model për të arritur më shumë. “Prandaj, në muajt që vijnë, do ta konkretizojmë bashkëpunimin tonë institucional prej të cilit do të përfitojmë të gjithë”.
 
Nga ana e saj, ministrja sllovene ka thënë se Sllovenia do t’i ketë vazhdimisht dyertë të hapura për bashkëpunim me Kosovën edhe në fushën e shëndetësisë.
 
“Jam shumë e lumtur që sot kam pritur ministrin e Shëndetësisë së Republikës së Kosovës.  Jemi njoftuar me gjendjen në shëndetësi në të dy vendet dhe jemi dakorduar për shkëmbim të përvojave dhe bashkëpunimit në këtë sektor. Kemi rënë dakord që të fillojmë angazhimin tonë konkret dhe kjo u pa edhe në nënshkrimin e marrëveshjes mes dy spitaleve tona të përgjithshme. Kemi rënë dakord që të nënshkruajmë edhe marrëveshje të tjera bashkëpunimi mes spitaleve tona”, tha ministrja Celarc.
 
Ministrat Ismaili dhe Kolar Celars janë pajtuar parimisht për nënshkrimin e një marrëveshjeje bashkëpunimi në mes të dy ministrive, në fushën e edukimit dhe menaxhimit shëndetësor.